வரமல்ல வாழ்க்கை

என்ன எழுதலாம்ன்னு யோசித்து எப்பவும் போல பெண் தலைப்புக்கே வந்துட்டேன் வேறு வழியின்றி !!

ஒரு பெண்ணா எங்களுடைய வட்டம் சின்னது. ரொம்ப யோசிக்க எதுவுமே இல்லை.நாங்க வளர்ந்த விதம் அப்படி. வீட்டுக்குள்ளேயே தான் அதிக நேரம் இருந்தது வெளி உலகம் தெரிய வாய்ப்புகள் மிகவும் குறைவு. 

அதிக ஏற்றத்தாழ்வுகள் அதிகம் பாதித்த ஒன்று. ஒரு அண்ணன்  வேற..
அடிக்கடி அம்மாவிடம் சண்டை போடுவது அண்ணனுக்கு மட்டும் இப்படியா அப்படியான்னு தான். ஆனாலும் பெண்கள் தானே பெண்களுடைய நிலைமைய பிரதிபலிக்கனும் ?! அதனால என்னுடைய அனுபவத்தினால் விளைந்த எண்ணங்களை பகிர்ந்துக்கறேன்.

ஒரு முறை கல்லூரியில் என் தமிழ் ஆசிரியை சொன்னது, "பெண்களுக்கு அதிக வேலை கொடுக்காட்டி ஒழுக்கமா இருக்க மாட்டாங்க, அதனால் தான் விடியற்காலை முதல் இரவு படுக்கும் வரை இடைவிடாமல் வேலை கொடுக்கப் பட்டது"ன்னு மனு தர்மத்தில் இருக்குன்னு.
ஒழுக்கம்னா என்ன? அதுக்கு அளவுகோள் என்ன? யார் ஒழுக்கமா இருக்கான்னு யாருக்குத் தெரியும்? இப்படியாக அதிகம் குழப்பம் தந்தது. 

படிப்பறிவு அதிகம் ஆனாலும்  இன்னமும் பெண் பிள்ளைகள் ஆண்களுக்கு நிகராக எண்ணிக்கையில் பிறப்பதில்லை அல்லது வாழ்வதில்லை.
 கடந்த ஆண்டு  சென்சஸ் செக்ஸ் ரேஷியோ - 933/1000.

பிறக்கவோ அல்லது வாழக்கூட தகுதி இல்லாத நிலைமைதான் பெண்ணினத்திற்கு. அப்படியே பிறந்தாலும் வாழ்க்கை அவ்வளவு எளிதல்ல. ஆண்களுக்கும் அப்படித்தான் அதில் சந்தேகம் இல்லை.

இருந்தாலும் பெண்கள் சந்திக்கும் பிரச்சனைகள் உடலையும்,மனதையும் ஒருசேர பாதிப்பது. 

தற்காப்பு என்பது மாறி சிறைபடுத்தல் என்றானது.எங்களுக்கு என்ன தேவை என்பதைக் கூட பகிர இடம் இல்லாததுதான் வேதனையானது. பெண் விடுதலை பெண்ணியம் என்பதே இன்று கேலிப்பொருளாக மாற்றி ஏளனம் செய்து பேச விடாமல் செய்கிறது சமூகம்.என் உரிமை அப்படின்னு எந்த பெண்ணாவது உரிமையுடன் அவர்கள் வீட்டில் பேச முடியுமா என்பது கூட சந்தேகமே! 

பெண்கள் விஷயத்தில் அதிகம் கடமைகள் மட்டுமே சுமத்தப் படுகிறது உரிமை என்பது என்னவென்றே தெரியாத பெண்கள் தான் அநேகம். அப்படியே மீறி உரிமை அப்படின்னு சில பெண்கள் பேசினாலும் அதற்கு வரும் எதிர்ப்பு சாதாரணமாக இருப்பதில்லை.மிகவும் கோரமான, வன்மம் மிக்க எதிர்ப்புகளையே சந்திக்க வேண்டியுள்ளது.பெரும்பாலும் பெண்கள் இவற்றை தவிர்த்து விடவே விரும்புகிறார்கள். ஏதாவது ஒரு வன்கொடுமையில் சிக்கினால் கூட வெளிகாட்டிக்கொள்வதில்லை பெண்கள். அப்படியே அடையாளப்படுத்தினாலும் அந்த பெண்ணைத்தான் முதலில் சந்தேகிக்கிறது உலகம் பெரும்பாலும்.

என்னுடைய தோழிகள் அதிகம் பேர் சொல்லக்கூடிய விஷயம் யாரையும் மாத்த முடியாது. அவர்களுடைய பெற்றோராகட்டும்,கணவனாகட்டும்,சகோதரனாகட்டும் யாரையும் மாற்ற முடியாது என்பதே இவர்களுடைய கருத்தாக இருக்கிறது.பெண் விடுதலைக்காக ஆண்கள் போராடினால் புனிதமாக மதிக்கிறோம். அதுவே ஒரு பெண் பெண்ணியம் பேசினால் அது ஒட்டு மொத்த ஆணினத்திற்க்கும் எதிரான செயல் என்றே சந்தேகிக்கிறோம் .

பெண்களுக்கு சுதந்திரம் வேணும் அப்படின்னு சொல்றதுகூட ஒரு பெண்ணாக இருக்க விரும்புவதில்லை இந்தச் சமூகம்...
தங்களுடைய சுதந்திரத்தை ஒழுங்கான முறையில் பயன்படுத்துவதில்லை தவறான வழிக்கு போறாங்கன்னு சொல்லிட்டு கிளம்பத் தான் நிறைய பேர் இருக்காங்க.

எப்படி உயர்ந்த ஜாதியில் பிறந்தவங்களுக்கு தங்களுடைய வேலைகளை தங்களுடைய வாய்ப்புகளை தாழ்த்தப் பட்டவங்களுடன் பகிர மனம் இல்லாம இன்னமும் இட ஒதுக்கீட்டை குறை சொல்றாங்களே அதே பயம் தான் இந்த ஆண் பெண் வேற்றுமையிலும் கூட.
மனதில் ஏதோ ஒரு மூலையில் எங்கே நமக்கான வாய்ப்பு, இடம் பறிக்கப்பட்டு விடுமோன்னு ஒரு பயம் இருக்கு ஆண்களுக்கு.
வரலாற்றை திருப்பி பார்த்தால் பெண்களேதான் தன்னை தற்காத்துக்கொள்ள வீட்டிலேயே தன்னை பூட்டிகொண்டாள். அதுவே காலப்போக்கில் வழக்கமாக பின்பற்றப்பட்டது ஒரு கட்டத்தில் திணிக்கப் பட்டது.

இது தான் சம காலங்களில் பெரிய குழப்பத்தை ஏற்படுத்துவது.

ஏனோ மேற்கத்திய நாடுகளில் இவ்வளவு குழப்பங்கள் இல்லை இந்த விஷயத்தில். கலாச்சாரம் என்ற ஒரு விஷயதிற்குள் போக விரும்பல பலர் மனம் புண் படுத்தவேண்டி இருக்கும் :)

நான் எழுதுறது எல்லோருக்கும் பிடிக்கனும்ன்னு எழுதல . 

யாரோ ஒருவராவது பெண்களுடைய கஷ்டத்தை கொஞ்சமாவது உணருவாங்களான்னு ஒரு நப்பாசை மட்டும்தான்.
எனக்குத் தோன்றிய கொஞ்சமே கொஞ்ச விஷயங்கள் மட்டும் தான் பகிர்ந்தேன். அப்புறம் எல்லாத்தையும் எழுதினா தஸ்லிமா சொல்றாமாதிரி "ஆண்களால் ஒரு பெண்ணியவாதி எப்போது வெறுக்கப் படுகிறாளோ அப்போதுதான் அவள் உண்மையான பெண்ணியவாதி" ங்கற மாதிரி நிலைமை வந்துரும். 

எனக்குத் தெரிந்து இப்போதைய சமூக நிலையில் மட்டுமில்லை எப்போதும் ஆணை வெறுத்து பெண்ணோ பெண்ணை வெறுத்து ஆணோ வாழ்வதென்பது இயலாத ஒன்று. புரிதல் பகிர்தல் சிறிதளவு இருந்தாலே போதுமானது . நிச்சயம் ஆண்களுடைய ஒத்துழைபின்றி பெண்களுக்கான இடம் என்பது கனவு மட்டுமே .பலர் புரிந்துக்கொண்டு இடம் கொடுக்குறாங்க சிலர் புரிந்துக்கொள்கிறார்கள் இன்னும் சிலர் புரிந்தும் புரியாதது போல காட்டிக்கொள்கிறார்கள் அவ்வளவுதான்.! 

அன்புடன்,
சோனியா அருண்குமார் @rajakumaari

டிஸ்கி: வேற ஒண்ணுமில்லை வெய்யில் அதிகமானதால குணா'வுக்கு மூளை ரொம்ப வேலை செய்து என்னையெல்லாம் எழுத சொல்லி கேக்குறாப்புல நிலைமை.!
நன்றி ரேணிகுண்டா பாயிஸ் கலக்குவோம்.! தோழிகள் மங்கை, வித்யா மற்றும் நண்பர்கள் கணேஷ், ரகு அவர்களுக்கும் நன்றிகள்.!!