அரவான்- களவியலுக்கும், காவலியலுக்கும் நடுவே ஊசலாடும் வாழ்வியல்

பூஜை போட்ட நாளிலிருந்தே என் எதிர்பார்ப்பை ஏகத்துக்கும் எகிறவைத்து காத்திருக்க வைத்த படம். காத்திருந்ததற்கு விழிமேல் பலன் வெள்ளியன்று முதல்காட்சி. பார்த்தேன்..ரசித்தேன்..

கதையை நான் இங்கு சொல்லப்போவதில்லை. களவுக்கும், காவலுக்குமான சடுகுடு ஆட்டம் முதல்பாதி.
உயிர்ப்பலிக்கு எதிராய் உரத்து குரல் எழுப்ப முனைந்திருக்கும் இரண்டாம்பாதி.

இனிவரும் காலங்களில் தமிழ்சினிமாவின் மிக முக்கியமானதொரு பதிவாக இருக்கப்போகிறது அரவான். வசந்தபாலன் & படக்குழுவினரின் ராட்சச உழைப்பிற்கு ஒரு ராயல் சல்யூட்.
இவ்வருட முழுவதும் கிடைக்கப்போகும் பாராட்டுதல்களுக்கு கையையும், வரும் வருடம் முழுவதும் கிடைக்கப்போகும் விருதுகளுக்கு பையையும் தயாராய் வைத்திருங்கள் சாரே.

வசந்தபாலன்- என்னசொல்ல.?
சமகால தமிழ் சினிமாவில் என் ஆதர்ச இயக்குனர் நாற்காலியிலிருந்து பாலாவை இறக்கிவிட்டு அமர்த்தலாய் அதில் அமர்கிறார் இப்படம் மூலம்... குறைந்தபட்சம் பாலாவின் அடுத்தப்படம் வரும் வரைக்குமாவது.

இந்தக்களத்திற்கான இவரின் முனைப்பும், உழைப்பும் பிரம்மிக்க வைக்கிறது.
டைட்டிலில் தொடங்கி நூற்றுக்கணக்கான துணை நடிகர்கள், காடுகள், மாடுகள், குதிரைகள், துரத்தல்கள், மோதல்கள் என படர்ந்து விரிந்த பிரமாண்ட கற்பனையை நிஜமாக்கியது வரை ஒவ்வொரு பிரேமிலும் மிரட்டல்.
ஹேட்ஸ் ஆஃப் வசந்தபாலன்.
கடைசியில் ஆதியை சிலையாகிவிட்ட கடவுளாகக் காட்டி டைட்டில் கார்ட் போடுமிடத்தில் அசத்தலான டைரக்டர் டச்.
அதேபோல இரண்டாம்பாதியில் சரித்திர பின்னணியில் ஒரு துப்பறியும் சஸ்பென்ஸ் த்ரில்லரை சத்தியமாக எதிர்பார்க்கவே இல்லை.
எனக்கு முதல்பாதியை விட இரண்டாம் பாதியே பிடித்திருந்தது.

களவுக்கான சின்னச்சின்ன, நுணுக்கமான டீடெயிலிங் தந்திருப்பதில் சு.வெங்கடேசனின் பங்களிப்பும் அளப்பரியது.
படம் பார்த்தபின்பு காவல் கோட்டம் மீதான காதலும், ஆவலும் அதிகரித்துக்கொண்டே செல்கிறது.
இதப்படிக்கிற நல்லமனசுக்காரவுக யாராச்சும் புக்கு ஓசியில குடுத்தீங்கன்னா எட்டெட்டு ஜென்மத்துக்கும் தேங்க்ஸ் உடையவனா இருப்பேன்..

ஆதி- இனிமேலும் தன்னை "மிருகம்" ஆதி என்றே கூறிக்கொள்ளலாம்.
படம் நெடுகிலும் ஒரு காட்டு மிருகத்தின் உடல்மொழியை அனாசியமாக வெளிப்படுத்தியிருக்கிறார்.
இவர் நல்ல இயக்குனர்களின் கையில் மாட்டி இதுபோல இன்னும் ஒன்றிரண்டு படங்களில் பட்டை தீட்டப்பட்டால் தமிழ் சினிமாவிற்கு இன்னொமொரு வைரம் தயார்.
பசுபதி- சும்மாவே இவர் அடித்து ஆடுவார். பவர்-ப்ளே கிடைத்தால் சும்மாவா இருப்பார்.? பின்னியிருக்கிறார் மனுஷன்.

தன்ஷிகா, அர்ச்சனா கவி, ஸ்வேதா மேனன், அஞ்சலி, சின்னராணியாக வருபவர் என படத்தில் அஞ்சு பஞ்சபாண்டவி அழகிகள்.
ஆனால் எனக்குப் பிடித்தது களவாணி திருமுருகன் மனைவியாக வரும் கறுப்புக் காந்தலழகி. தென்மேற்குப் பருவக்காற்றில் நாயகனின் முறைப்பெண்ணாக கலைச்செல்வி கேரக்டரில் வருவரே.. அந்த களையான செல்விதான்.
கரிய பெரிய விழிகளால் ஆயிரம் கதைகள் சொல்கிறாள் இப்பெண்.
இவரையும் தமிழ்சினிமா பயன்படுத்திக்கொண்டால் அருமையான கேரக்டர் ஆர்டிஸ்டாக மிளிர்வார் என அவதானிக்கிறேன்.

அப்புறம் நம்ம அஞ்சலிக்குட்டிக்கு என்னாச்சி.?
அடுத்த நமீதா ஆவதற்கான ஆரம்பகட்ட சாத்தியகூறுகள் தெரிகின்றன. உடம்பை கவனிக்கணும் செல்லம்...

தவிரவும் படத்தில் பீக்-ஹவர் ட்விட்டர் சந்து போல எக்கச்சக்க நட்சத்திர பட்டாளம். ஆனாலும் ஒருவர் கூட தேவையின்றி படத்திலில்லை.
நகைச்சுவை கூட்ட சேர்க்கப்பட்டிருக்கும் சிங்கம்புலி கூட திரைக்கதையின் முக்கிய முடிச்சவிழ்க்க இரண்டு இடங்களில் பயன்பட்டிருக்கிறார்.

சித்தார்த்தின் காமிரா களவுக்காட்சிகளில் பூனை போல் பதுங்கிப் பின்தொடர்ந்தும், சண்டைக் காட்சிகளில் புலிபோல் பாய்ந்து ஆர்பரித்தும் தன் இருப்பை உறுத்தாமல் பதிவு செய்திருக்கிறது.
இசை கார்த்திக்- ஒரு அறிமுக இசையமைப்பாளருக்கு சரித்தியப் பின்னணியிலான களம் என்பது குருவித்தலை பனங்காயல்ல; பரங்கிக்காய். தன்னாலான மட்டும் சிறப்பாகவே சுமந்திருக்கிறார். வாழ்த்துக்கள்.

தியேட்டரில் அப்ளாஸ் அள்ளிய காட்சிகள்- வீட்டுக்கார கிழவி வெற்றிலை இடிக்கும் டோனிலேயே பசுபதி அண்ட் கோ கஜானாப்பெட்டியை இடித்து பார்ப்பது;
தேவதாசி வெள்ளி அரைஞான்கயிற்றை வைத்து அது யாருடையது என கண்டறியும் ஐடியா. உண்மையிலேயே செம்ம சீன் அது..

படத்தில் எனக்குப் பிடித்த காட்சி- "தெறமும் தாட்டியமும் இருக்கவன் என்கூட வா..தெறம் கெட்டவன் தெசையத்தேடி ஓடிப்போ.." என்றுவிட்டு ஆதி ஆயிரம் எருதுகள் புடைசூழ பசுபதியை மீட்கச்செல்லும் காட்சி.
உண்மையில் அந்தகாட்சிக்கு படு அடாசான கிராஃபிக்ஸ் பல்லை இளித்துக்கொண்டு தெரிந்தாலும் அந்த முழு எபிசோடும் ஹீரோயிசத்தின் உச்சம். ஹீரோயிசம் என்றால் காமெராவை பார்த்து வசனம் பேசுவதுதான் என நினைத்துக்கொண்டு காட்சியமைப்பவர்களும், நடிப்பவர்களும் தினத்துக்கும் தூங்கப்போகும் முன் இந்த காட்சியை பார்த்துவிட்டு தூங்கச்செல்லுதல் அவர்களின் எதிர் காலத்துக்கும், தமிழ் சினிமாவின் எதிர் காலத்துக்கும் நன்மை பயக்கும்.

அப்புறம் பாடல்கள்- இதுபோன்றதொரு கதைக்களத்திற்கும் தேவைப்படும் டூயட்டுகள் தமிழ் சினிமாவை பிடித்திருக்கும் கமர்ஷியல் சாபத்தீடு.
படத்தின் முற்பாதி கொஞ்சம் நீளம்; பிறப்பாதி ரொம்பவே நீளம்- இதற்கு காரணம் பாடல்கள்.
அதிலும் யார் கொலையாளி என்கிற முடிச்சை நோக்கி செல்லும் பின்பாதியில் வரும் இரண்டு டூயட்டுகள் கதையோட்டத்துக்கு வேகத்தடை அல்ல;வேகமலை.
பாரபட்சமே பார்க்காமல் மூன்று பாடல்களை வெட்டி வீசினால் இன்னும் வசீகரிப்பான் அரவான்.

பொதுவாகவே பாடல் மேலாண்மையில் வசந்தபாலன் இன்னும் கற்றுத்தேற வேண்டும் என்கிற எனது கருத்து இப்படத்தில் இன்னமும் உறுதிப்பட்டிருக்கிறது. களவுடா பாட்டுக்கான பிளேஸ்மெண்ட் சொதப்பல். அதனை களவாட செல்லும்போதெல்லாம் தீம் சாங் போல பயன்படுத்தியிருக்க வேண்டும்.
போல ஊரே..ஊரே.. பாட்டுக்கான முழு காட்சியமைப்புக்களும் இன்னொரு மெகா சொதப்பல். இன்னமும் நம் கிராமங்களில் நெல்லை தெய்வமாக கும்பிடுவார்கள். ஆனால் பதினெட்டாம் நூற்றாண்டில் நடக்கும் கதையில் அந்தப்பாடல் முழுக்க நெல்லை காலில் மிதித்தும், கொண்டாட்டத்தில் அள்ளி வீசியும் ஆடிப்பாடுகிறார்கள். அதிலும் நெல் என்பது ஒரு அதிசயமாக கிடைதற்கரிய பொக்கிஷம் எனும் காலகட்டத்தில் இதுபோல ஒருபோதும் எவரும் செய்ய மாட்டார்கள்.. என்னதான் கொண்டாட்டமாக இருந்தபோதிலும்..

இனி சில குறைகள்- படத்தின் இறுதியில் மரணதண்டனைக்கு எதிராக போடப்படும் ஸ்லைட் படத்துடன் துளிகூட ஒட்டாமல் துருத்திக்கொண்டு நிற்கிறது. இயக்குனர் சொல்லவந்த கதைக்கரு உயிர்பலிக்கு எதிரானதெனில், படத்தின் ஆரம்பத்திலிருந்தே அதற்கான காட்சியமைப்புகளை வைத்திருக்க வேண்டும். உயிர்பலி என்கிற கான்செப்டே இரண்டாம்பாதியின் இரண்டாம்பாதியில்தான் வருகிறது.

படத்தில் வருபவர்கள் பேசும் மொழி- படத்தில் வரும் அனைவருமே தற்க்கால தமிழ் பேசுவது பதினெட்டாம் நூற்றாண்டில் நடக்கும் கதை என்கிற ஃபீலை பெருமளவிற்கு குறைக்கிறது. முழுக்க முழுக்க அந்த காலகட்டத்திய மொழியை கையாளவில்லை எனினும் ஓரளவிற்கேனும் அது குறித்து கவனத்தில் கொண்டிருக்க வேண்டும் இயக்குனர். அதிலும் தன்ஷிகா'விற்கு அவரே சொந்தக்குரல் டப்பிங் போலிருக்கிறது. ஒட்டவேயில்லை.

ஆதிக்கு பதிலாக வேறு ஒருவரை பலி கொடுத்த பின்னரும், ஊர் மொத்தமும் காலில் விழுந்து மன்னிப்புகேட்ட பின்னரும் அவர்கள் ஆதியை பலிகொடுக்க விடாமல் துரத்திக் கொண்டிருப்பது ஏன்.?

ராஜாவை யாருக்கும் தெரியாமல் அவர் அறையில் சென்று ஆதி சந்திப்பது வரை ஓகே.. அனால் அவரை கட்டி தூக்கிக்கொண்டு வரும்வரை காவலாளிகள் யாருமே பார்க்கவில்லையா.? ஏன் துரத்திக்கொண்டு வரவில்லை.?அதற்கப்புறமும் எதிர் கோஷ்டிதான் ஆதியை துரத்துகிறர்களே ஒழிய ராஜகுடும்பத்தினர் யாரும் அவரை கண்டுகொண்டதாகவே தெரியவில்லையே.?

கிராஃபிக்ஸ் -நாம் என்னதான் தொழில் நுட்ப சங்கதிகளில் ஹாலிவுட்டிற்கு இணையாக முன்னேறி விட்டோம் என மார்தட்டிக் கொண்டாலும் இந்தப்பாதையில் நாம் இன்னும் பயணிக்க வேண்டிய தூரம் நிறைய.. படத்தில் ஒருசில கிராஃபிக்ஸ் காட்சிகளே வருகின்றன. அனைத்துமே அப்பட்டமான அமெச்சூர்த்தனம்.

யாரெல்லாம் பார்க்கலாம்.?- நல்லப்படம் பார்க்கவேண்டும் என்கிற ஆர்வமுள்ள அனைவரும் பார்க்கலாம்.. குறிப்பா ஒலக சினிமா விமர்சகர்கள் தங்கள் அறிவிஜீவித்தனத்தை மறக்காமல் வீட்டிலேயே மறந்தாற்போல் வைத்துவிட்டு சென்றால் சிறப்பாக ரசிக்கலாம்.

ப்ரியங்களுடன்,
குணா யோகசெல்வன் :-)))